ბარსელონას სპორტული დირექტორი მაროკოში დემბელეს აგენტთან მოლაპარაკებების განსაახლებლად ჩავიდა

„ბარსელონა“ მზადაა უსმან დემბელესთან ახალ კონტრაქტზე მოლაპარაკებები განაახლოს.

ESPN-ს ინფორმაციით, კატალონიელები ფრანგ ფეხბურთელთან მოლაპარაკებების მაგიდას ხელახლა მიუსხდებიან და შეთანხმებას შეეცდებიან.

უახლოეს დღებში, კლუბის სპორტული დირექტორი მატეუ ალემანი მაროკოში ფეხბურთელის აგენტ მუსა სისოკოს შეხვდება. მენეჯერი მარაკეშში უკვე ჩაფრინდა.

მხარეებს შორის მოლაპარაკებები 2021 წლის მიწურულს ჩაიშალა, თუმცა ხავიმ ფეხბურთელის ტრიბუნაზე გადასმაზე უარი თქვა და დიდი სათამაშო დროც მისცა.

ამ სეზონში დემბელემ ლა ლიგის 13 მატჩში 10 საგოლე პასი მიითვალა. „ბარსელონასთან" მოქმედი კონტრაქტი მას სეზონის ბოლოს ეწურება.