ერიქსენი: "ხუთი წუთის მანძილზე ამქვეყნად არ ვიყავი"

რამდენიმე დღის წინ ოფიციალურად დადასტურდა, რომ 29 წლის დანიელი ნახევარმცველი, კრისტიან ერიქსენი სეზონის ბოლომდე პრემიერლიგურ "ბრენტფორდში" ითამაშებს.

გამოცდილ შუახაზელს თავის უკანასკნელ ინტერვიუში გაახსენეს ევრო 2020-ზე გადატანილი გულის შეტევა, რომელმაც მისი კარიერა მთლიანად შეცვალა.

"ხუთი წუთის მანძილზე ამქვეყნად არ ვიყავი, მერე კი გული ისევ ამუშავდა. ყველაფერი მახსოვს, გარდა იმ ხუთი წუთის - მიწაზე ვეცემი, ბურთი მუხლში მხვდება... შემდეგ რა მოხდა, ვერ ვიხსენებ. თვალის გახელისას გარშემო მდგარი ადამიანები დავინახე. მკერდში ჭვალს ვგრძნობდი და სუნთქვის მოწესრიგებას ვცდილობდი.

ვიყურებოდი, მაგრამ რა ხდებოდა, ვერ ვხვდებოდი. მაშინ ვერც ვიაზრებდი, რა მომივიდა. პირველი აზრები, რომელმაც გონებაში გამიარა, იყო: "ფეხებზე მომივიდა რამე? ხერხემალი დავიზიანე? ფეხის გამოძრავება შემიძლია?" ვცდილობდი, რომ განვძვრეულიყავი, რათა გამეგო, რა ხდებოდა ჩემს თავს.

სასწრაფო დახმარების მანქანაში გავიგე, თუ როგორ იკითხა ვიღაცამ: "რამდენ ხანს გაუგრძელდა უგონოდ ყოფნა?" ვიღაცამ მიუგო: "ხუთი წუთი". მაშინ პირველად მივხვდი, რომ კლინიკური სიკვდილი გამოვიარე.

წააგავდა თუ არა ეს ყოველივე სასწაულს? რა თქმა უნდა," - ამბობს ერიკსენი.

შეგახსენებთ, რომ კრისტიანმა გულის შეტევა დანია-ფინეთის მატჩის მიმდინარეობისას მიიღო. ამ ინციდენტის გამო შეხვედრა შეწყდა, თუმცა იგი მაშინვე გაგრძელდა, როცა გაირკვა, რომ ერიქსენის სიცოცხლეს საფრთხე აღარ ემუქრებოდა.

გამოცდილ ნახევარმცველს ახლა გულში დეფიბრილატორი აქვს ჩაყენებული. ეს გახდა მისი "ინტერიდან" წამოსვლის მიზეზი - იტალიის კანონმდებლობა მას სერია ა-ში ამ მოწყობილობით თამაშის ნებას არ აძლევდა, ამიტომ კრისტიანმა "ფუტკრებს" მიაშურა.