მესი მარადონას დონეზეა, როგორ უნდა ლანძღო - პოჩეტინომ ლეო დაიცვა

პარი სენ ჟერმენის არგენტინელმა მთავარმა მწვრთნელმა მაურისიო პოჩეტინომ თანამემამულე ვარსკვლავ ლიონელ მესის შესახებ ვრცლად ისაუბრა. 

“მესის განსჯა არასწორია. მის ოსტატობაში ეჭვი არ მეპარება, მესის საკმარისზე დიდი ნიჭი აქვს, რათა გააკეთოს ის, რისი ვალდებულიც არის და აკეთებს კიდეც. მომავალ სეზონში ნახავთ, სრულად განსხვავებული იქნება. პირველი წელი იყო, რაც ყველაფრის შესასწავლად დასჭირდა.

ახალ გუნდში მოვიდა, ახალი სტილი, ახალი გუნდელები, ახალი გარემო საცხოვრებლად. ამდენი ცვლილება ადამიანზე გავლენას ახდენს. 

მესიზე, როგორც მარადონაზე ცუდად და მითუმეტეს, ლანძღვით საუბარი მიუღებელია. საქმე საშუალო დონის ფეხბურთელს ხომ არ ეხება, ეს მესია, ის მარადონას სიმაღლეზეა. ნათელია, რომ ბარსადან პსჟ-ში გადმოსვლა მისთვის დიდი ცვლილებაა და ლეოს ადაპტაცია სჭირდება.

გარკვეული გარემოებები მესის თავს ისე კომფორტულად არ აგრძნობინებდა, როგორც ბარსელონაში იყო, იქ ხომ 20 წელი გაატარა,” - ციტირებს პოჩეტინოს AS.

34 წლის არგენტინელმა საფრანგეთის ლიგა 1-ში 23 მატჩი ჩაატარა, 4 გოლი გაიტანა და 13 საგოლე გადაცემა გააკეთა. პარიზული კლუბის ფანები კი მესის თამაშით უკმაყოფილო არიან და მისი სახელის გამოცხადებას სტადიონზე სტვენით ხვდებიან ხოლმე.