კროლი: "ნაპოლი" სერია ა-ში საუკეთესო ფეხბურთს თამაშობს"

იტალიური "ნაპოლის" ყოფილი მცველი, რუუდ კროლი მიიჩნევს, რომ თუ "პარტენოპეი" მომავალ უქმეებზე გასამართ მატჩში მილანის "ინტერს" მოუგებს, სერია ა-ში საჩემპიონი ინტრიგა დაბრუნდება.

"თუ "ნაპოლი" მოიგებს, სკუდეტოსთვის ბრძოლა განახლდება. "აძურის" ჩემპიონატში საუკეთესო დაცვა ჰყავს, მაგრამ ყველა უნდა დაფასდეს; ფორვარდებიც კი, რომლებიც თანაგუნდელებს ეხმარებიან.

ვიმედოვნებ, რომ "ნაპოლი" ბოლოს და ბოლოს მოახერხებს გაჩემპიონებას. მათი მჯერა. ჩემს აზრში დარწმუნებული ვარ, რადგან ვფიქრობ, რომ ისინი სერია ა-ში საუკეთესო ფეხბურთს თამაშობენ.

გუნდმა რთული პერიოდი გადალახა. ტრავმებისა და კოვიდის გამო მათ რამდენიმე პრობლემური თვე ჰქონდათ, მაგრამ ახლა მნიშვნელოვანი გამარჯვებების სერია აქვთ," - თქვა კროლმა.

შეგახსენებთ, რომ "ნაპოლისა" და "ინტერნაციონალეს" ჯახი შაბათს, 12 თებერვალს, 21 საათზე (ჩვენი დროით) დაიწყება.

ლუჩიანო სპალეტის შეგირდებს ახლა 52 ქულა აქვთ, სერია ა-ში მეორე პოზიციას იკავებენ და თუ ხვალ მოიგებენ, პირველადგილოსან "ნერაძურის" 2 ქულით გაასწრებენ.

მნიშვნელოვანია ისიც, რომ "ინტერს" კონკურენტებზე 1-ით ნაკლები მატჩი აქვს ჩატარებული.