„აი, ამის ეშინია ივანიშვილს და ამას გაარიდა შვილები საქართველოდან“ – ყველაძე მძიმე სცენარი, რომელიც შეიძლება ქვეყანაში განვითარდეს

პოლიტიკა

15-02-2022, 21:10

„აი, ამის ეშინია ივანიშვილს და ამას გაარიდა შვილები საქართველოდან“ – ყველაძე მძიმე სცენარი, რომელიც შეიძლება ქვეყანაში განვითარდეს

„ნაცმოძრაობისა“ და სხვა ოპოზიციონერმა ლიდერებმა, არჩევნების წინ გაავრცელეს ინფორმაცია, რომ ბიძინა ივანიშვილი საქართველოდან ამერიკაში გაიქცა და ოჯახიც უცხოეთში გაიხიზნაო. ივანიშვილს საქართველო არ დაუტოვებია, ოჯახი კი უცხოეთში ჰყავს, მაგრამ ის არსად წასულა. „ალიას“ წყარო აცხადებს, რომ ივანიშვილს ყველაზე მეტად ერთი რამის ეშინია:

„სოციალური მდგომარეობა ქვეყანაში უკიდურესად დამძიმდა და ხალხის ყოფა დღითი–დღე უარესდება. „ნაცმოძრაობამ“ „თავისუფლების მოედანზე“ აქცია რომ მოაწყო, იქ ბევრი იყო ისეთი, სულ არ აინტერესებდა „ნაცები“ და სააკაშვილი. ბევრი მიიყვანა გაჭირვებამ, ბევრს ჩამოსვლა უნდოდა რეგიონებიდან და მიზეზთა გამო ვერ მოახერხა.

ეს იმას ნიშნავს, რომ ბევრს სააკაშვილის რეჟიმის პირობებში ცხოვრება ურჩევნია, შიმშილით სიკვდილს. სახალხო ბუნტის რეალური საფრთხე არსებობს. ხალხს შია და პურის ფული არ აქვს, შვილი და შვილიშვილი ჰყავს ავად და წამალს ვერ ყიდულობს. გამწარებული ხალხი კი ძალიან საშიშია. ეს კარგად იცის ივანიშვილმა. გრძნობს, თუ რაღაც არ შეცვალა, სახალხო აჯანყება გარდაუვალია. მალე ხალხს აღარ დასჭირდება წინამძღოლად პოლიტიკური პარტიები. ვერც კორონავირუსის გამო დაწესებული შეზღუდვები შეაკავებს.

კომენდანტის საათიც რომ დააწესოს ხელისუფლებამ, ეს დროებითი გამოსავალი იქნება. როდემდე იქნება ეს კომენდანტის საათი? ხომ გააუქმებენ. აი, ამ სახალხო ბუნტისა ეშინიათ ივანიშვილს და მის გარემოცვას. იმიტომ გაარიდა შვილები საქართველოდან. რევოლუციურ პროცესებს პოლიტიკოსები მართავენ, მათთან მოლაპარაკება და გარანტიების მიღება შეიძლება მაშინაც, თუკი ხელისუფლების დათმობის გარდა, სხვა გზა აღარ გაქვს. ეს „ვარდების რევოლუციამ“ და რევოლუციონერთა მიერ ედუარდ შევარდაძისადმი მიცემულმა გარანტიებმაც დაადასტურა. მართალია, უცხო ქვეყნების ჩარევით, მაგრამ შევარდნაძემ გარანტიები მიიღო. სახალხო ბუნტის დროს კი არავის არაფრის გარანტია არ გააჩნია. ვერც ერთი სახალხო ლიდერი ვერავის ვერაფრის გარანტიას ვერ მისცემს, რადგან თავადაც არ ეცოდინება, ორი დღის მერე იქნება თუ არა ისევ ლიდერი.

გამწარებული ხალხი თუ გამოვიდა გარეთ, ხელისუფლების ლიდერებს ის ექნებათ სანატრელი, როგორმე ოჯახები გადაარჩინონ, თავად შეიძლება ვერც გაასწრონ ხალხს. გარეგნულად არ იმჩნევენ, მაგრამ „ქართულ ოცნებაში“ უკვე პანიკური შიში აქვთ სახალხო აჯანყებისა. დღეს ხელისუფლების ერთადერთი მოკავშირე პანდემიაა, მაგრამ მალე ეს მოკავშირეც ვეღარ უშველის. დასავლეთისგან განწირულ ბიძინა ივანიშვილს ვერც რუსეთი უშველის. რუსეთი შეიძლება ჩაერიოს დასავლეთის მიერ მოწყობილ რევოლუციაში, მაგრამ სახალხო ბუნტის შეკავებას არც კი შეეცდება. რას იზამს? ჯარს შემოიყვანს? ქართველ ხალხს დაუპირისპირდება? ეს აბსურდია. ეს 9 წელი ხელი რომ გაეტოკებინა „ქართულ ოცნებას“ და ქვეყნის ეკონომიკისთვის მიეხედა, საკუთარი ჩინოვნიკებისა და სხვა და სხვა რანგის დეპუტატების მადა დაეოკებინა, ქვეყნის ქონებისა და ბიუჯეტის ძარცვის მეტი სხვაც ეკეთებინათ რაიმე სასიკეთო, ხალხისთვის ყოფა შეემსუბუქებინათ და არა გაეუარესებინათ, ასეთ დღეში არ ჩაცვივდებოდნენ“ – უთხრა „ალიას“ წყარომ.

რა მოხდება, თუ ქვეყანაში მართლა სახალხო აჯანყება დაიწყება? რას მოიმოქმედებს ხელისუფლება? პოლიციას დაუპირისპირებს ხალხს და სისხლში ჩაახშობს აჯანყებას თუ გაერიდება გამწარებულ ხალხს და დათმობს ხელისუფლებას? ამ კითხვებზე წყაროს კონკრეტული პასუხები აქვს:

„ბიძინა ივანიშვილმა, დიდი შანსია, ძალის გამოყენება სცადოს. არამარტო მას, არავის ეთმობა ხელისუფლება და ის უზარმაზარი ფული და ქონება, რაც იშოვნეს და რის შოვნაც გეგმაში აქვთ. თუმცა, ვიცი, რომ პოლიცია არ დადგება ხელისუფლების მხარეს. ეს შესაძლო საფრთხე, უკვე მუსირებს პოლიციის სისტემაში. შსს–ში არიან ავტირიტეტული პოლიციელები, ცხადია, გარკვეული თანამდებობის პირები, რომლებიც არათუ ხალხს არ დაუპირისპირდებიან, მათ მხარეს დადგებიან და სხვა პოლიციელებსაც ამას მოუწოდებენ. ბიძინა ივანიშვილს არც ჯარი გაჰყვება, თუ ამაზე მიდგა საქმე. ჯარისკაცები და ოფიცრები არ დაუპირისპირდებიან ხალხს. ეს არის ყველაზე მძიმე და სრულიად რეალური სცენარი, რომელიც შეიძლება ქვეყანაში განვითარდეს, მაგრამ სამწუხაროდ, „ქართული ოცნების“ უგუნურმა მმართველობამ მიიყვანა აქამდე საქმე.

დაბოლოს, ერთსაც ვიტყვი და ამჯერად ამით დავასრულოთ. „ქართული ოცნებიდან“ მალე მოისვრიან დიტო სამხარაძეს, რეგიონული სამსახურის უფროსს და პარლამენტის დეპუტატს. ბიძინა ივანიშვილი უკმაყოფილოა არჩევნების შედეგებით, განსაკუთრებით, რეგიონებში. ზოგადად, „ქართულ ოცნებაში“ წმენდა იქნება. არჩევნებს მიხეილ სააკაშვილის ჩამოსვლა, დაჭერა, შიმშილობა და მერე მისი კლინიკაში გადაყვანის მთელი ეპოპეა რომ არ მოჰყოლოდა, ეს პროცესი უკვე დასრულებული იქნებოდა, მაგრამ მთელი პარტია სააკაშვილის რეჟიმზე მუშაობდა. ვის დააქვეითებენ სამხარაძის გარდა პარტიაში, ჯერ უცნობია, მაგრამ ვფიქრობ, მარტო მის მოცილებას არ დასჯერდებიან, რადგან არჩევნების ივანიშვილისთვის არასასურველი შედეგები არა მარტო სამხარაძეს ბრალდება.

სამხარაძეს თუ გაუშვებენ, მას მიჰყვება „ქართული ოცნების“ რეგიონული და რაიონული სამსახურების ბევრი უფროსი“, – განუცხადა წყარომ „ალიას“.