ლიუკმა ისევ გაიტანა, გავიმ დააღალატა - "ბარსამ" გამარჯვება 89-ე წუთზე გაუშვა ხელიდან

ლა ლიგის მე-20 ტურში "გრანადა" და "ბარსელონა" დაზავდნენ - 1:1.

პირველ ტაიმში სტუმრებმა ერთადერთი მომენტი გამოიყენეს, მაგრამ ლიუკ დე იონგს გოლი თამაშგარეს გამო არ ჩაუთვალეს. ნიდერლანდელმა მაინც გაიტანა, როდესაც მეორე სართულზე მეურვე დაჯაბნა და ანგარიში გახსნა. მან ზედიზედ ორ შეხვედრაში დალაშქრა მეტოქეთა კარი.

„ბარსელონას“ სასტარტოში იყო გუნდში დაბრუნებული 38 წლისა და 247 დღის დანი ალვეში. ის კატალონიური გუნდის ყველაზე ასაკოვანი ფეხბურთელი გახდა, რომელმაც პრიმერაზე ითამაშა. ბრაზილიელი ურიგოდ ნამდვილად არ გაისარჯა და საგოლე გადაცემა გააკეთა. 79-ე წუთზე მეორე ყვითელი ბარათი მიიღო
„ბარსას“ 17 წლის ნახევარმცველმა გავიმ, მასპინძლებმა რიცხობრივ უმცირესობაში დარჩენილ მოწინააღმდეგეს შეუტიეს და პუერტამ ანგარიში გაათანაბრა. "გრანადას" გამარჯვების მოპოვებაც შეეძლო, მაგრამ კომპენსირებულ დროში მონტოროს დარტყმული ბურთი ტერ შტეგენმა მოიგერია.

„ბარსა“ 32 ქულით მე-6 ადგილზეა და 24 იანვარს გასვლაზე „ალავესს“ დაუპირისპირდება, იქამდე კი 12 იანვარს ესპანეთის სუპერთასის ნახევარფინალში „რეალს“ შეხვდება.

გრანადა. „ლოს კარმენესი“
გრანადა - ბარსელონა 1:1
გოლები: 0:1 ლ. დე იონგი (57), 1:1 პუერტა (89)
გაძევება: გავი (79)

- "ბარსელონა" ყველა ტურნირზე ბოლო 6 მატჩში დაუმარცხებელია - 3 მოგება და 3 ფრე.
- ტერ შტეგენმა ლა ლიგაზე მე-200 შეხვედრა ჩაატარა - ის მეოთხე გერმანელია, რომელმაც ამ შედეგს მიაღწია.