დირექტორი კვარაცხელიას აგენტს შეხვდა - დე ლაურენტისის გეგმა მკაფიოა
საქართველოს ნაკრებისა და ნაპოლის ვარსკვლავი ხვიჩა კვარაცხელია ბოლო დღეებში ესპანურმა მედიამ მადრიდის რეალს დაუკავშირა. სწორედ ამ საკითხს შეეხო ცნობილი იტალიური გაზეთი "კორიერე დელო სპორტი", რომელიც წერს, რომ ნაპოლი მშვიდადაა, რადგან კვარაცხელიას გასხვისებას დამდეგ ზაფხულს არ აპირებს.
წყაროს თანახმად, აურელიო დე ლაურენტისს ქართველი გარემარბის შენარჩუნება გადაწყვეტილი აქვს, რის გამოც ფეხბურთელთან კონტრაქტის განახლებისა და მისი პირობების გაუმჯობესებაზე მუშაობა უკვე დაწყებულია.
"კორიერე დელო სპორტი" წერს, რომ ნეაპოლელთა სპორტული დირექტორი კრისტიანო ჯუნტოლი ბოლო რამდენიმე თვეში ხვიჩას აგენტ მამუკა ჯუღელს რამდენჯერმე შეხვდა, რომელსაც განუცხადა, რომ სეზონის ბოლოს ხელფასის მომატება იგეგმება. ამგვარად, ნეაპოლში რეალისა და სხვა კლუბების ინტერესის მიუხედავად, კვარაცხელიას დაკარგვის შიში არ აქვთ.
